طريقة مضمونة لنجاح الكرواصون

السلام عليكم ورحمة الله تعالى وبركاته

موقع لوامع يقدم لكم : 

طريقة مضمونة لنجاح الكرواصون

طريقة مضمونة لنجاح الكرواصون

طريقة لنجاح الكرواصون بالخطوات المصورة

خطوة خطوة لنجاح عجينة الكرواصون

وصفة اليوم ان شاء الله فيها جميع الخطوات والاسرار لضمان نجاح عجينة الكرواصون، الى تبعتو الخطوات و النصائح لي غنعطي مزيان كونو علا يقين غتحصلو على كرواصون منزلية لديدة جدا انا شخصيا تنفضلها علا ديال المخبزات

ادن اول حاجة غتكون هي الزبدة، انا هنا استعملت الزبدة ديال العبار فالتوارق مع دابا الحال البارد متدوبش داغي ومتتعدبناش فالخدمة عكس ملي تتكون الحرارة تيكون من الصعب نخدمو بيها ' شخصيا فالصيف ملي تنبغي نديرهوم تنستعمل ماركرين ديال التوراق، حتا هي تتعطي نتيجة مزيانة لكن بالزبدة ديال العبار النتيجة افضل بكتير '

ادن الزبدة تنجبدها تكون باردة و قاصحة تنبقا نضربها بالمدلك تتولي ورقة واحدة وتنحاول نعطيها شكل مربع، تنعاود ندخلها للتلاجة وندوز للعجين

مقادير الكرواصون

500 غ طحين

70 غ سنيدة

10 غ ملح

20 غ خميرة

50 غ زبدة لينة

240 مل حليب بارد ' ممكن اقل ممكن اكتر، 

المهم العجين تيكون قاصح شوية '

للتوارق

200 غ زبدة ' هاديك لي كتليكم نبداو بيها هي الاولى '

طريقة تحضير الكرواصون

ادن العجين نخلط كلشي ونبدا نزيد الحليب تتجمع العجين تم ندلكها مزيان تتولي ملساء، نغطيها بشي منديل ونخليها ترتاح شي نصف ساعة

من بعد تنطلقها تكون طويلة و العرض ديالها نحاولو يكون من نفس العرض ديال الزبدة لي صاوبنا، تنديرها فبلاطو وندخلها للتلاجة شي ربع ساعة باش تبرد وتكون هي و الزبدة عندهم نفس درجة الحرارة

من بعد تندير الزبدة فالوسط كيف متتشوفو فالصور

تندور العجين بحيت ان التنية ديالها تكون علا اليمين ديالي

تم ندبا نضغط عليها بالمدلك بشوية بشوية، مهم جدا منجيش ونطلق نيشان بالمدلك غتخرج الزبدة، 

ادن نبقا نضغط بالشوية حتا تتطلق عاد نكمل الطليق عادي، ومنكتروش الطحين فمكان العمل، دابا غنتني العجين ت الوسط ونعاود نتني ، الصور توضح

وقبل منتني العجين دائما نبقا نمسحو من الطحين، منتنيش ونخلي الطحين الداخل

تنعاود ندور العجين ونرد التنية فاليمين ديالي وندير نفس العملية، ملي نسالي ندخلها للتلاجة باش تعاود تبرد الزبدة واحد 20 الى 30 د

ملي نجبدها نعاود ندير نفس العملية لي درنا فالاول، يعني فالمجموع تنكون درت 4 دورات

تنقسمها لنصفين 

نصف تنسرح ونقطعو مستطيلات باش نشكل بتي بان، ' العجين خاص يبقا غليض شوية منرققوهش '

والنصف الآخر نديرو مثلثات باش ندير الكرواصون، بالنسبة للكرواصون قبل منلويه تنقبط المتثلث ديالي ونحاول نجبد بيدي برفق تيضاعف الطول ديالو ويرقاق وملي نجيو نلووي منزييرش بزاف باش نخليلها فين تحل وتورق

تنغطيهم مزيان ونخليهم يخمرو فمكان دافئ ،

ندهنهم من بعد باصفر البيض مطلوق بشوية الحليب تم ندخلهم يطيبو في فرن ساخن جدا

وهاهما الكرواصون واجدين 
بالصحة والراحة