السلام عليكم ورحمة الله تعالى وبركاته
قدم من طرف موقع لوامع
بريوات باللوز لذيذة وجميلة
مقادير طريقة تحضير البريوات باللوز بطريقة رائعة و بالمراحل المصورة
مقادير تحضير البريوات باللوز
500 غ لوز
1ملعقة صغيرة قرفة
250 غ سكر كلاصي
4 دالبيضات مطربين
ورقة البسطيلة
زيت لقلي اللوز
ربع ملعقة صغيرة مسكة حرة مدقوقة
ربع كاس ماء زهر
زيت لقلي البريوات
لعسل
طريقة تحضير البريوات باللوز بالمراحل
كنسلقو اللوز و نقشروه و نشفوه ثم نقليوه فزيت سخونة
منين يبرد نطحنوه
كنضيفو عليه السكر كلاصي و القرفة
كناخدو تقريبا كاس الا ربع دالزيت لي قلينا فيها اللوز ونديروها فطاوة على نار مهيلة تغلي و تنضيفو اللوز
و كنخلطو حتى يتجمع لينا اللوز
كنضيفو البيض على مراحل و كل مرة نضيفو البيض كنخلطو بسرعة باش مايطيبش لينا
كنضيفو ماء زهر
و كنستمرو فالتخلاط و دائما على نار مهيلة
حتى تجمع لينا الخليط
كنطفي لبوطا و عاد كنضيف المسكة الحرة باش ماتقسحش لينا البريوات
منين بردات عملتها كويرات
كناخدو الورقة كندهنوها بشوية دالزيت و الجناب كندهنهم بالبيض
ثم كنبدا نطويو البريوات بالشكل المعتاد غير نتبهو مع الجناب نسدوهم مزيان باش ماتخرجش لينا العقدة منين نكونو كنقليوها
الطرف لي كيبقى كندهنوه بالبيض و كندخلوه لداخل لبريوات
نديرو الزيت تسخن مزيان و نباو فقلي البريوات
و فنفس الوقت نديرو العسل تسخن و ننقصو البوطا
منين خداو اللون الذهبي كنزولوهم من الزيت و نرميوهم فالعسل
ثم من بعد كنصفوهم من الزيت الزائد
منين وجدو نزوقهم بزنجلان وبالصحة والراحة
Aucun commentaire:
Enregistrer un commentaire